Selected Ghazal of Urdu Poet's........ مختلف شعراء کی غزلیں

  *********************************************************************************

.................................................................................................................................................................

*************************************************
**************************************************

 غزلحفیظ جالندھری

ہم میں ہی تھی نہ کوئی بات، یاد نہ تُم کو آ سکے
تُم نے ہمیں بُھلا دیا، ہم نہ تمہیں بُھلا سکے

تُم ہی اگر نہ سُن سکے، قِصّۂ غم سُنے گا کون
کس کی زباں کُھلے گی پھر، ہم نہ اگر سُنا سکے

ہوش میں آ چکے تھے ہم، جوش میں آ چکے تھے ہم
بزْم کا رنگ دیکھ کر سَر نہ مگر اُٹھا سکے

رونقِ بزْم بن گئے، لب پہ حکایتیں رہیں
دل میں شکایتیں رہیں لب نہ مگر ہِلا سکے

شوقِ وصال ہے یہاں، لب پہ سوال ہے یہاں
کِس کی مجال ہے یہاں ہم سے نظر مِلا سکے

ایسا ہو کوئی نامہ بر، بات پہ کان دھر سکے
سُن کے یقین کرسکے، جا کے اُنھیں سُنا سکے

عجْز سے اور بڑھ گئی  برہمیِ مزاجِ دوست
اب وہ کرے علاجِ دوست، جس کی سمجھ میں آ سکے

اہلِ زباں تو ہیں بہت، کوئی نہیں ہے اہلِ دل
کون تِری طرح حفیظ ، درد کے گیت گا سکے

حفیظ جالندھری

......................

غزلِ

مرزا اسداللہ خاں غالب

رونے سے اور عِشق میں بیباک ہوگئے
دھوئے گئے ہم اتنے، کہ بس پاک ہوگئے

صرفِ بہائے مے ہُوئے آلاتِ میکشی !
تھے یہ ہی دو حساب سو یُو ں پاک ہوگئے

رُسوائے دہر گو ہُوئے آوار گی سے تم
بارے طبیعتوں کے تو چالاک ہوگئے

کہتا ہے کون نالۂ بُلبُل کو بے اثر
پردے میں گُل کے، لاکھ جگر چاک ہوگئے

پُوچھے ہے کیا وجُود و عدم اہلِ شوق کا
آپ اپنی آگ کے خس و خاشاک ہوگئے

کرنے گئے تھے اُس سے تغافل کا ہم گِلہ
کی ایک ہی نِگاہ کہ بس خاک ہوگئے

اِس رنگ سے اُٹھائی کل اُس نے اسد کی نعش
دُشمن بھی جس کو دیکھ کے غمناک ہوگئے

مرزا اسداللہ خاں غالب
...............................

ronay se aur ishq meN be'baak ho ga'ay
dho'ay ga'ay hum itnay keh bas paak ho ga'ay

serf-e-baha'ay may hu'ay aalaat-e-may'kashi
thay ye hii do hisaab , so yuN paak ho ga'ay

ruswaa-e-dehr go hu'ay aawaargi se hum
baaray tabee'atoN ke to chaalaak ho ga'ay

kehta hai kon naala-e-bulbul ko be'asar
perday meN gul laakh jigar chaak ho ga'ay

pooche hai kya wajood-o-adam ehl-e-shauq ka
aap apni aag ke khas-o-khashaak ho ga'ay

kerne ga'ay thay un se taghaful ka hum gila
kii aik hi nigaah keh bas khaak ho ga'ay

is rang se uThaii kal us ne asad kii na'ash
dushman bhi jis ko daikh ke ghamnaak ho gaiye

Mirza Asad Ullah KhaN Ghalib

***************

 
غزلِ

فیض احمد فیض 

سچ ہے ہمیں کو آپ کے شکوے بجا نہ تھے
بے شک ستم جناب کے سب دوستانہ تھے

ہاں، جو جفا بھی آپ نے کی قاعدے سے کی!
ہاں، ہم ہی کاربندِ اُصولِ وفا نہ تھے

آئے تو یوں کہ جیسے ہمیشہ تھے مہرباں
بُھولے تو یوں کہ گویا کبھی آشنا نہ تھے 

کیوں دادِ غم ہمیں نے طلب کی، بُرا کیا
ہم سے جہاں میں کشتۂ غم اور کیا نہ تھے

گر فکرِ زخم کی تو خطاوار ہیں کہ ہم
کیوں محوِ مدح خوبیِ تیغِ ادا نہ تھے

ہر چارہ گر کو چارہ گری سے گریز تھا
ورنہ ہمیں جو دکھ تھے ، بہت لادوا نہ تھے

لب پر ہے تلخیِ مئے  ایّام، ورنہ فیض
ہم تلخیِ کلام پہ مائل ذرا نہ تھے

فیض احمد فیض
************** 

**************
شیخ محمد ابراہیم ذوق

بے یار روزِعید،  شبِ غَم سے کم نہیں
جامِ شراب،  دِیدۂ پُرنَم سے کم نہیں

دیتا ہے دَورِ چرخ کسے فُرصتِ نِشاط
ہو جس کے پاس جام وہ اب جَم سے کم نہیں

اُس زُلفِ فتنہ زا کے لئے اے مسیح دم
کچھ دستِ شانہ پنجۂ مریَم سے کم نہیں

زیبا ہے رُوئے زرد پر کیا اشک لالہ گوں
اپنی خِزاں بہار کے موسَم سے کم نہیں

سُرعت ہے نبض کی رَگِ سنگِ مزار میں
دل کی تپش کچھ اب بھی تَپِ غَم سے کم نہیں

وحشی کو تِری چشم کے مژگانِ ہرغزال
صحرا میں تیز ناخنِ ضیغم سے کم نہیں

ہوتی ہے جمعِ زر سے پریشانی آخرش !
دِرہم کی شکل صُورتِ دَرہَم سے کم نہیں

ساقی مِلے ہزار فلاطوُں ہیں خاک میں
جو خُم تہی ہے قالبِ آدم سے کم نہیں

اُس حُوروِش کا گھر مجھے جنّت سے ہے سَوا
لیکن،  رقیب ہو تو جہنّم سے کم نہیں

شورابۂ سرشک سے دھوتا ہُوں زخمِ دل
تیزاب میرے حق میں یہ مرہَم سے کم نہیں

ہاتھوں سے تیرے پارۂ الماس و زخمِ دل
مجھ کو تو جلوۂ گُل و شبنَم سے کم نہیں

سمجُھوں غنیمت اِس دمِ خنجر کو کیوں نہ میں
اِس بے کسی میں یہ، مجھے ہمدَم سے کم نہیں

اے ذوق کس کو چشم حقارت سے دیکھیے
سب ہم سے ہیں زیادہ، کوئی ہم سے کم

شیخ محمد ابراہیم ذوق
 

**************************************************

غزل
حسرت موہانی

چُپکے چُپکے رات دن آنسو بہانا یاد ہے
ہم کو اب تک عاشقی کا وہ زمانہ یاد ہے

با ہزاراں اضطراب و صد ہزاراں اشتیاق
تجھ سے وہ پہلے پہل دل کا لگانا یاد ہے

بار بار اُٹھنا اُسی جانب نگاہِ شوق کا
اور تِرا غرفےسے وہ آنکھیں لڑانا یاد ہے

تجھ سے کچھ مِلتے ہی وہ بے باک ہو جانا مِرا
اور تِرا دانتوں میں وہ اُنگلی دبانا یاد ہے

کھینچ لینا وہ مِرا پردے کا کونا دفعتاً
اور دوپٹے سے تِرا وہ منھ چھپانا یاد ہے

جان کر سوتا تجھے وہ قصْدِ پا بوسی مِرا
اور تِرا ٹھکرا کے سر، وہ مُسکرانا یاد ہے

تجھ کو تنہا جب کبھِی پانا تو از راہِ لحاظ
حالِ دل باتوں ہی باتوں میں جتانا یاد ہے

جب سَوا میرے تمہارا کوئی دیوانہ نہ تھا
سچ کہو کچھ تم کو بھی وہ کارِخانہ یاد ہے

غیر کی نظروں سے بچ کر سب کی مرضی کے خلاف
وہ تِرا چوری چھپے راتوں کو آنا یاد ہے

آگیا گر وصْل کی شب بھی کہیں ذکرِ فراق
وہ تِرا رو رو کے مجھ کو بھی رُلانا یاد ہے

دوپہر کی دُھوپ میں، میرے بُلانے کے لئے
وہ تِرا کوٹھے پہ ننگے پاؤں آنا یاد ہے

آج تک نظروں میں ہے وہ صُحْبَت و راز و نیاز
اپنا جانا یاد ہے، تیرا بُلانا یاد ہے

مِیٹھی مِیٹھی چھیڑ کی باتیں نرالی پیار کی
ذکردشمن کا وہ باتوں میں اڑانا یاد ہے

دیکھنا مجھ کو جو برگشتہ تو سو سو ناز سے
جب منا لینا تو پھر خود روٹھ جانا یاد ہے

چوری چوری ہم سے تم آ کر مِلے تھے جس جگہ
مُدّتیں گُزریں، پر اب تک وہ ٹھکانا یاد ہے

شوق میں مہندی کے وہ بے دست وپا ہونا ترا
اور مِرا وہ چھیڑنا ، وہ گُدگُدانا یاد ہے

باوجودِ اِدّعائے اِتّقا حسرت مجھے
 آج تک عہدِ ہَوَس کا وہ فسانہ یاد ہے

**************************************************

**************************************************
غزلِ

امیراللہ تسلیم لکھنوی

کیوں خرابات میں لافِ ہمہ دانی واعظ
کون سُنتا ہے تِری ہرزہ بیانی واعظ

دفترِ وعظ کے نقطے بھی نہ ہوں گے اتنے
جتنے ہیں دل میں مِرے داغِ نہانی واعظ

سچ سہی جنت و دوزخ کا فسانہ لیکن
کِس طرح مان لوں میں تیری زبانی واعظ

بے وضو پائے خمِ بادہ کو چُھو لیتا ہے
خاک آتی ہے تجھے مرتبہ دانی واعظ

نرم بھی دل سُخنِ گرم سے اب تک نہ ہُوا
دیکھ لی ہم نے تِری شعلہ بیانی واعظ

نیک و بد خُوب سمجھتا ہُوں کروں کیا کہ ابھی
سُننے دیتا نہیں آشوبِ جوانی واعظ

رندی و زہدِ ریائی میں ہیں دونوں یکتا
مثل میرا ہے نہ تیرا کوئی ثانی واعظ

یہ خرابات ہے جا خیر سے اپنے گھر کو
منہ کی کِھلوائے نہ پھر تیز زبانی واعظ

آج سمجھا گئی کیا تجھ کو عبادت تیری
نہ رہا مشغلۂ اشک فشانی واعظ

اِس قدر ہے جو دمِ نزع ہوَس دُنیا کی
ساتھ لے جائے گا کیا عالمِ فانی واعظ

رِند ہُوں دے مجھے جامِ مئے اطہر کی خبر
تجھ کو کوثر کا مُبارک رہے پانی واعظ

زرد ہو جاتا ہے سُن کر رُخِ گلگوں میرا
تِری تقریر ہے یا بادِ خزانی واعظ

نقشہ فردوس کا باتوں میں دِکھا دیتا ہے
یہ زباں ہے تِری یا خامۂ مانی واعظ

چلتے پھرتے نہیں بے وجہ یہ رونا میرا
ساتھ پِھرتا ہُوں لِیے غم کی نشانی واعظ

کیا رُکے خامۂ تسلیم دمِ فکرِ سُخن
طبْع میں آج ہے دریا کی روانی واعظ

امیراللہ تسلیم لکھنوی 

**************************************************

غزلِ
مولانا حسرت موہانی 

عشقِ بُتاں کو جی کا جنجال کرلیا ہے
آخر یہ میں نے اپنا کیا حال کرلیا ہے

سنجیدہ بن کے بیٹھو اب کیوں نہ تم کہ پہلے
اچھی طرح سے مجھ کو پامال کرلیا ہے

نادم ہُوں جان دے کر، آنکھوں کو تُو نے ظالم
رو رو  کے بعد میرے کیوں لال کرلیا ہے

تعزیز دل میں اتنی شدّت نہ کر جب اُس نے
خود جُرمِ عاشقی کا اِقبال کرلیا ہے

کیا کیا ہے شوق نازاں حسرت کہیں جو خوشبو
اُس کی جبینِ تر سے رومال کرلیا ہے

************************************************** 

 

غزلِ

احمد فراز

سلسلے توڑ گیا، وہ سبھی جاتے جاتے
ورنہ اتنے تو مراسم تھے، کہ آتے جاتے

شکوۂ ظلمتِ شب سے، تو کہیں‌ بہتر تھا
اپنے حِصّے کی کوئی شمع جلاتے جاتے

کتنا آساں تھا ترے ہجر میں مرنا جاناں
پھر بھی اک عمر لگی، جان سے جاتے جاتے

جشنِ مقتل ہی نہ برپا ہوا، ورنہ ہم بھی
پابجولاں ہی سہی، ناچتے گاتے جاتے

اِس کی وہ جانے اُسے پاسِ وفا تھا کہ نہ تھا
تم فراز! اپنی طرف سے تو، نبھاتے جاتے

احمد فراز

***************

***************

غزلِ
ناصر کاظمی

ترے خیال سے لَو دے اٹھی ہے تنہائی
 شبِ فراق ہے یا تیری جلوہ آرائی

تو کس خیال میں ہے منزلوں کے شیدائی
 اُنھیں بھی دیکھ جِنھیں راستے میں نیند آئی

پُکار اے جرسِ کاروانِ صبحِ طرب
 بھٹک رہے ہیں اندھیروں میں تیرے سودائی

ٹھہر گئے ہیں سرِ راہ خاک اُڑانے کو
 مسافروں کو نہ چھیڑ اے ہوائے صحرائی

رہِ حیات میں کچھ مرحلے تو دیکھ لئے
 یہ اور بات تری آرزو نہ راس آئی

یہ سانحہ بھی محبّت میں بارہا گزرا
 کہ اس نے حال بھی پوچھا تو آنکھ بھر آئی

دلِ فسردہ میں پھر دھڑکنوں کا شور اُٹھا
 یہ بیٹھے بیٹھے مجھے کن دنوں کی یاد آئی

میں سوتے سوتے کئی بار چونک چونک پڑا
 تمام رات ترے پہلوؤں سے آنچ آئی

جہاں بھی تھا کوئی فتنہ تڑپ کے جاگ اُٹھا
 تمام ہوش تھی مستی میں تیری انگڑائی

کھُلی جو آنکھ تو کچھ اور ہی سماں دیکھا
 وہ لوگ تھے، نہ وہ جلسے، نہ شہرِ رعنائی

وہ تابِ درد وہ سودائے انتظار کہاں
 اُنہی کے ساتھ گئی طاقتِ شکیبائی

پھر اس کی یاد میں دل بے قرار ہے ناصر
 بچھڑ کے جس سے ہوئی شہر شہر رسوائی
***************
***************
غزلِ

اصغرگونڈوی 

نہ ہوگا کاوشِ بے مدّعا کا رازداں برسوں
وہ زاہد، جو رہا سرگشتۂ سود و زیاں برسوں

ابھی مجھ سے سبق لے محفلِ رُوحانیاں برسوں
رہا ہوں میں شریکِ حلقہٴ پیرِ مُغاں برسوں

کچھ اس انداز سے چھیڑا تھا میں نے نغمۂ رنگیں
کہ فرطِ ذوق سے جھومی ہے شاخِ آشیاں برسوں

جبینِ شوق لائی ہے وہاں سے داغِ ناکامی   
یہ کیا کرتی رہی کم بخت، ننگِ آستاں برسوں   

وہی تھا حال میرا، جو بیاں میں آ نہ سکتا تھا   
جسے کرتا رہا افشا، سکوتِ رازداں برسوں   

 نہ پوچھو، مجھ پہ کیا گزری ہے میری مشقِ حسرت سے 
قفس کے سامنے رکھّا رہا ہے آشیاں برسوں   

خروشِ آرزو ہو، نغمۂ خاموش الفت بن   
یہ کیا اک شیوۂ فرسودۂ آہ و فغاں برسوں   

نہ کی کچھ لذّتِ افتادگی میں اعتنا میں نے   
مجھے دیکھا کِیا اُٹھ کر غبارِ کارواں برسوں   

وہاں کیا ہے؟ نگاہِ ناز کی ہلکی سی جنبش ہے   
مزے لے لے کے اب تڑپا کریں اربابِ جاں برسوں   

محبّت ابتدا سے تھی مجھے گُلہائے رنگیں سے   
رہا ہوں آشیاں میں لے کے برقِ آشیاں برسوں   

میں وہ ہر گز نہیں جس کو قفس سے موت آتی ہو   
میں وہ ہوں جس نے خود دیکھا نہ سوئے آشیاں برسوں   

غزل میں دردِ رنگیں تُو نے اصغر بھر دیا ایسا   
کہ اس میدان میں روتے رہیں گے نوحہ خواں برسوں   

مولانا اصغرگونڈوی
***************
***************

 غزلِ

رگھو پتی سہائے
 فراق گورکھپوری

سر میں سودا بھی نہیں، دل میں تمنّا بھی نہیں
لیکن اِس ترکِ محبت کا بھروسہ بھی نہیں

دل کی گنتی نہ یگانوں میں نہ بیگانوں میں
لیکن اُس جلوہ گہہِ ناز سے اُٹھتا بھی نہیں

شکوۂ جور کرے کیا کوئی اُس شوخ سے جو
صاف قائل بھی نہیں، صاف مُکرتا بھی نہیں

مہربانی کومحبت نہیں کہتے، اے دوست
آہ اب مجھ سے تری رنجش بیجا بھی نہیں

بات یہ ہے کہ سکونِ دلِ وحشی کا مقام
کنجِ زنداں بھی نہیں، وسعتِ صحرا بھی نہیں

مدّتیں ہوئیں، تِری یاد بھی آئی نہ ہمیں
اور تمھیں بھول گئے ہوں کبھی، ایسا بھی نہیں

فراق گورکھپوری

****************

.................................................................

********************************

غزلِ
یاس یگانہ عظیم آبادی

چلے چلو، جہاں لے جائے وَلوَلہ دل کا
دلیلِ راہِ محبّت ہے فیصلہ دل کا

ہوائے کوچۂ قاتل سے بس نہیں چلتا
کشاں کشاں لیے جاتا ہے وَلوَلہ دل کا

گلِہ کِسے ہے کہ قاتل نے نیم جاں چھوڑا
تڑپ تڑپ کے نکالوں گا حوصلہ دل کا

خُدا بچائے، کہ نازک ہے اِن میں ایک سے ایک
تنک مزاجوں سے ٹھہرا مُعاملہ دل کا

دِکھا رہا ہے یہ دونوں جہاں کی کیفِیَّت
کرے گا ساغرِجم کیا مقابلہ دل کا

ہَوا سے وادیِ وحشت میں باتیں کرتے ہو
بھلا یہاں کوئی سُنتا بھی ہے گِلہ دل کا

قیامت آئی کُھلا رازِ عشق کا دفتر
بڑا غضب ہُوا، پُھوٹا ہے آبلہ دل کا

کسی کے ہو رہو اچھّی نہیں یہ آزادی
کسی کی زُلف سے لازم ہے سِلسِلہ دل کا

پیالہ خالی اُٹھا کر لگا لِیا مُنہ سے
کہ یاس کچھ تو نکل جائے حوصلہ دل کا

یاس یگانہ چنگیزی
‍‍‌‌١٩١٢

.................................................................

********************************

غزل

عبیدالله علیم

کوئی دھُن ہو میں تِرے گیت ہی گائے جاؤں
درد سینے میں اُٹھے شور مچائے جاؤں

خواب بن کر تُو برستا رہے شبنم شبنم
اور بس میں اُسی موسم میں نہائے جاؤں

تیرے ہی رنگ اُترتے چلے جائیں مجھ میں
خود کو لکھوں تری تصویر بنائے جاؤں

جس کو مِلنا نہیں پھر اُس سے محبّت کیسی
سوچتا جاؤں، مگر دل میں بسائے جاؤں

تُو اب اُس کی ہوئی جس پہ مجھے پیار آتا ہے
زندگی آ تجھے سینے سے لگائے جاؤں

یہی چہرے مِرے ہونے کی گواہی دیں گے
ہر نئے حرف میں جاں اپنی سمائے جاؤں

جان تو چیز ہے کیا رشتۂ جاں سے آگے
کوئی آوازدیئے جائے، میں آئے جاؤں

شاید اِس راہ پہ کچھ اور بھی راہی آئیں
دُھوپ میں چلتا رہوں سائے بِچھائے جاؤں

اہلِ دل ہوں گے تو سمجھیں گے سُخن کومیرے
بزم میں آ ہی گیا ہُوں، تو سُنائے جاؤں

عبید اللّہ علیم

غزلِ

(رسا)

کرتا ہوں برقِ قہْر کا خُوگرجِگر کو میں
    چھُپ چھُپ کے دیکھتا ہوں کسی کی نظر کو میں

    کردے اگر گُداز اِسے گرمئِ سُجود
    کرلوں جَبِیں میں جذب تِرے سنگِ در کو میں

    اُن کو یہ ڈر نہ آئے کہِیں آستاں پہ حرف
    مُجھ کو یہ ضِد کہ رکھ کے اُٹھاؤں نہ سر کو میں

    اللہ ! اپنی نعمتِ  عُظمٰی کو پھیر لے
    ذوقِ نظر نہیں تو کروں کیا نظر کو میں

    پَو پھوٹنے سے پہلے ہی دِل جَل بُجھا مِرا
    کیا مُنہ دکھاؤں آج نسیمِ سحر کو میں

    کٹتی نہیں ہے راہِ مصیبت کسی طرح
    خنجر مِلے توختم کروں اِس سفر کو میں

    آنکھوں میں کِھچ کے آگیا سب حسرتوں کا خُوں
    کہیئے تو اب دِکھاؤں نظر کے اثر کو میں

    لو صُحبَتِ شبانہ کی لذّت بھی مِٹ چکی
    حسرت سے دیکھتا ہوں چراغِ سحر کو میں

    چھوڑے تھے جس کی آس پہ دونوں جہاں رسا
    پُوچھے وہی نہ بات توجاؤں کِدھر کو میں

****************

.................................................................

********************************

غزلِ

سُرُور بارہ بنکوی

اور کوئی دَم کی ہے مہماں گزر جائے گی رات
ڈھلتے ڈھلتے آپ اپنی موت مرجائے گی رات

زندگی میں اور بھی کچھ زہر بھرجائے گی رات
اب اگر ٹھہری، رگ و پے میں اترجائے گی رات

ہے اُفق سے ایک سنگِ آفتاب آنے کی دیر
ٹوٹ کر مانندِ آئینہ بکھر جائے گی رات

ہم تو جانے کب سے ہیں آوارۂِ ظُلمت مگر
تم ٹھہرجاؤ تو پل بھر میں گزر جائے گی رات

رات کا انجام بھی معلُوم ہے مُجھ کو سُرُور
لاکھ اپنی حد سے گزرے تاسحر، جائے گی رات

سُرُور بارہ بنکوی 

****************

.................................................................

********************************

  ( 1)

غزلِ

سیّدعابدعلی عابد

جبینِ تمنّا کی تابانیاں ہیں
کہ دل میں ابھی تک پُرافشانیاں ہیں

یونہی تیرے گیسو ہیں رُسوا، کہ مجھ کو
پریشانیاں تھیں، پریشانیاں ہیں

ہَمِیں رمْز جِینے کی پہچانتے ہیں
پشیمانیاں سخت نادانیاں ہیں

قفس ہم کو راس آگیا ہم صفیرو
سَحَرخیزیاں ہیں، غزل خوانیاں ہیں

محبت کے آداب کس کو بتاؤں
سُبک ساریاں ہیں، گِراں جانیاں ہیں

تجلّی کو ہے آرزوئے تماشا
تمھاری بھی کیا جلوہ سامانیاں ہیں

وہ لعلِ سُخن داں وہ چشْمِ سُخن گو
ادا فہمیاں ہیں، ادا دانیاں ہیں

نہ جینا ہے مشکل محبت میں عابد
نہ یہ ہے، کہ مرنے میں آسانیاں ہیں

سیّدعابدعلی عابد

   *********** 

 ( 2)

غزلِ

سیدعابدعلی عابد

عجب نہیں جو محبت مری سرشت میں ہے
یہی شرار نہاں روحِ سنگ وخشت میں ہے

نہ بجلیوں کوخبر ہے نہ خوشہ چیں کو پتہ
کہ اِک نہال تمنّا ہماری کشت میں ہے

یہ رنگ ونُور کے نغمے یہ دلکشا جلوے
صنم کدے ہیں کہ ذوقِ نظر بہشت میں ہے

ابھی نگاہ پہ ہیں  رسم و وہم کے پردے
ابھی خیال طِلسماتِ خُوب و زشت میں ہے

حرم کے دیدہ وروں سے پتہ مِلا عابد
کہ ڈھونڈ نے جسے نکلے ہو وہ کنشت میں ہے

 سید عابدعلی عابد

 

****************

.................................................................

********************************

غزلِ

میرتقی میر

حرَم کو جائیے، یا دیر میں بَسر کریے

تِری تلاش میں اک دل کدھر کدھر کریے

کٹے ہے، دیکھئے یُوں عمْر کب تلک اپنی

کہ سُنئے نام تِرا اور چشم تر کریے

وہ مست ناز تو مچلا ہے کیا جتائیے حال

جوبے خبر ہو بھلا اُس کے تئیں خبرکریے

ہُوا ہے، دن تو جُدائی کا سو تَعَب سے شام

شبِ فِراق کِس اُمید پر سَحَر کریے

جہاں کا دید بجُز ماتمِ نَظارہ نہیں

کہ دِیدَنی ہی نہیں جس پہ یاں نظرکریے

جُنوں سے جاتے ہیں ناچارآہ کیا کیا لوگ

کبھو تو جانبِ عُشّاق بھی گُزَر کریے

سِتم اُٹھانے کی طاقت نہیں ہے اب اُس کو

جو دل میں آوے، تو ٹک رحم میر پر کریے

میرتقی میر

****************

.................................................................

********************************

غزلِ

افتخارعارف

آسمانوں پر نظر کر انجم و مہتاب دیکھ
صبح کی بنیاد رکھنی ہے تو پہلے خواب دیکھ

ہم بھی سوچیں گے دعائے بے اثر کے باب میں
اِک نظر تو بھی تضادِ منبر و محراب دیکھ

دوش پر ترکش پڑا رہنے دے، پہلے دل سنبھال
دل سنبھل جائے تو سوئے سینہٴ احباب دیکھ

موجہٴ سرکش کناروں سے چھلک جائے تو پھر
کیسی کیسی بستیاں آتی ہیں زیرِ آب دیکھ

بوند میں سارا سمندر آنکھ میں کل کائنات
ایک مشتِ خاک میں سورج کی آب وتاب دیکھ

کچھ قلندر مشربوں سے راہ و رسمِ عشق سیکھ
کچھ ہم آشفتہ مزاجوں کے ادب آداب دیکھ

شب کو خطِ  نُور میں لکھّی ہوئی تعبیر پڑھ
صبح تک دیوارِ آئیندہ میں کُھلتے باب دیکھ

افتخار عارف کے تند و تیز لہجے پر نہ جا
افتخار عارف کی آنکھوں میں اُلجھتے خواب دیکھ

افتخار عارف

****************

.................................................................

********************************

غزل

سید محمد اثر

تو مری جان گر نہیں آتی

زیست ہوتی نظر نہیں آتی

دلربائی و دلبری تجکو

گو کہ آتی ہے پر نہیں آتی

حالِ دل مثلِ شمع روشن ہے

گو مجھے بات کر نہیں آتی

ہر دم آتی ہے گرچہ آہ پر آہ

پر کوئی کارگر نہیں آتی

کیا کہوں آہ میں کسو کے حضور

نیند کس بات پر نہیں آتی

نہیں معلوم دل پہ کیا گزری

ان دنوں کچھ خبر نہیں آتی

کیجے نامہربانی ہی آ کر

مہربانی اگر نہیں آتی

دن کٹا جس طرح کٹا لیکن

رات کٹتی نظر نہیں آتی

ظاہراً کچھ سوائے مہر و وفا

بات تجکو اثر  نہیں آتی

 سید محمد اثر

****************

.................................................................

******************************** 

غزل 

پنڈت لبھو رام جوش ملسیانی 

 

بلا سے کوئی ہاتھ ملتا رہے
ترا حسن سانچے میں ڈھلتا رہے

ہر اک دل میں چمکے محبت کا داغ
یہ سکّہ زمانے میں چلتا رہے

ہو ہمدرد کیا جس کی ہر بات میں
شکایت کا پہلو نکلتا رہے

بدل جائے خود بھی تو حیرت ہے کیا
جو ہر روز وعدے بدلتا رہے

مری بے قراری پہ کہتے ہیں وہ
نکلتا ہے دم تو نکلتا رہے

پلائی ہے ساقی جو آنکھوں سے آج
اسی کا بس اب دور چلتا رہے

تمھیں ہم سحابِ کرم بھی کہیں
امیدوں کا خرمن بھی جلتا رہے

یہ طولِ سفر یہ نشیب و فراز
مسافر کہاں تک سنبھلتا رہے

کوئی جوہری جوش ہو یا نہ ہو
سخنور جواہر اگلتا رہے

****************

.................................................................

********************************

 غزلِ

 جاں نثار اختر

رنج و غم مانگے ہے، اندوہ و بلا مانگے ہے
دل وہ مجرم ہے کہ خود اپنی سزا مانگے ہے

چپ ہے ہر زخمِ گلو، چپ ہے شہیدوں کا لہو
دستِ قاتل ہے جو محنت کا صِلہ مانگے ہے

تو بھی اک دولتِ نایاب ہے، پر کیا کہیے
زندگی اور بھی کچھ تیرے سوا مانگے ہے

کھوئی کھوئی یہ نگاہیں، یہ خمیدہ پلکیں
ہاتھ اٹھائے کوئی جس طرح دعا مانگے ہے

راس اب آئے گی اشکوں کی نہ آہوں کی
آج کا پیار نئی آب و ہوا مانگے ہے

بانسری کا کوئی نغمہ نہ سہی، چیخ سہی
ہر سکوتِ شبِ غم کوئی صدا مانگے ہے

لاکھ منکر سہی پر ذوقِ پرستش میرا
آج بھی کوئی صنم، کوئی خدا مانگے ہے

سانس ویسے ہی زمانے کی رکی جاتی ہے
وہ بدن اور بھی کچھ تنگ قبا مانگے ہے

دل ہر اک حال سے بیگانہ ہوا جاتا ہے
اب توجہ، نہ تغافل، نہ ادا مانگے ہے
جاں نثار اختر

*******************

 غزلِ

جاں نثار اختر

 افق اگرچہ پگھلتا دکھائی پڑتا ہے
 مجھے تو دُور سویرا دکھائی پڑتا ہے

ہمارے شہر میں بے چہرہ لوگ بستے ہیں
 کبھی کبھی کوئی چہرہ دکھائی پڑتا ہے

چلو کہ اپنی محبت سبھی کو بانٹ آئیں
 ہر ایک پیار کا بھوکا دکھائی پڑتا ہے

جو اپنی ذات سے اک انجمن کہا جائے
 وہ شخص تک مجھے تنہا دکھائی پڑتا ہے

نہ کوئی خواب، نہ کوئی خلش، نہ کوئی خمار
 یہ آدمی تو ادھورا دکھائی پڑتا ہے

لچک رہی ہیں شعاعوں کی سیڑھیاں پیہم
 فلک سے کوئی اترتا دکھائی پڑتا ہے

چمکتی ریت پہ یہ غسلِ آفتاب ترا
بدن تمام سنہرا دکھائی پڑتا ہے

****************

.................................................................

********************************

غزل

فیض احمد فیض

یوں سجا چاند کہ جھلکا ترے انداز کا رنگ
یوں فضا مہکی کہ بدلا مرے ہمراز کا رنگ

سایۂ چشم میں‌حیراں رُخِ روشن کا جمال
سُرخیِ لب میں‌ پریشاں تری آواز کا رنگ

بے پئے ہوں، کہ اگر لطف کرو آخر شب
شیشۂ مے میں‌ڈھلے صبح کے آغاز کا رنگ

چنگ و نے رنگ پہ تھے اپنے لہو کے دم سے
دل نے لے بدلی تو مدّھم ہُوا ہر ساز کا رنگ

اک سُخن اور، کہ پھر رنگِ تکلّم تیرا
حرفِ سادہ کو عنایت کرے اعجاز کا رنگ

فیض احمد فیض
****************
.................................................................
********************************

غزل

احمد فراز
ہنگامۂ محفل ہے کوئی دم،  کہ چلا میں
ساقی مِرے ساغر میں ذرا کم، کہ چلا میں

کچھ دیرکی مہمان سرائے ہے یہ دنیا
چلنا ہےتوچل اے مِرے ہمدم، کہ چلا میں

پھر بات، ملاقات کبھی ہو کہ نہیں ہو
پھریارکہاں فرصتِ باہم، کہ چلا میں

یہ سلسلۂ آمد وشد کیا ہے کہ،  یا رب

اک شورنفس میں ہے دمادم، کہ چلا میں

جوعمرگزاری ہے بڑی دھج سے گزاری
اب کوئی خوشی ہے نہ کوئی غم کہ چلا میں

یہ دل کا ٹپکنا،  کہ ٹھہرتا ہی نہیں ہے
یارو کوئی نشتر، کوئی مرہم، کہ چلا میں

اے دوست!  فراز ایک دِیا ہے تِرے در کا
کیا جانئے، کہہ دے وہ کسی دم، کہ چلا میں

 
احمد فراز

****************

.................................................................

********************************

غزلِ

ناصرکاظمی

پھر نئی فصْل کےعنواں چمکے
ابْر گرجا، گُلِ باراں چمکے

آنکھ جھپکوں تو شرارے برسیں
سانس کھینچوں تو رگِ جاں چمکے

کیا بِگڑ جائے گا اے صُبْحِ جمال
آج اگر شامِ غرِیباں چمکے

اے فلک بھیج کوئی برقِ خیال
کچھ تو شامِ شبِ ہِجراں چمکے

پھر کوئی دل کو دُکھائے ناصر
کاش یہ گھر کسی عنواں چمکے

ناصر کاظمی 

****************

.................................................................

********************************

غزل

نواب مصطفیٰ خاں شیفتہ
 
ہوا نہ مدّ ِ نظر چشمِ یار کے بدلے
ہزار رنگ یہاں روزگار کے بدلے

صبا کو بھائی جو محفل کی تیری، رنگینی
چمن کو داغ دیے لالہ زار کے بدلے

کِیا ارادہ اگر سیرِ باغ کا تم نے
قیامت آئے گی ابر بہار کے بدلے

خلافِ عہد ہے شیوہ، تو کیا قباحت ہے؟
ستم کا عہد، وفا کے قرار کے بدلے

عجب ہی شہر ہے دِلّی بھی، شیفتہ ! ہرگز
میں روم وشام نہ لوں اس دیار کے بدلے
 

مصطفیٰ خاں شیفتہ 

****************

.................................................................

********************************

غزل

شفیق خلش
 
عذابِ زیست  کی  سامانیاں  نہیں  جاتیں
میری نظر سے  وہ  رعنائیاں نہیں  جاتیں

بچھڑ کے تجھ سے بھی پرچھائیاں نہیں جاتیں
جو تیرے دم سے تھیں شنوائیاں، نہیں جاتیں

گو ایک عمر جُدائی میں ہو گئی ہے بسر
خیال وخواب سے انگڑائیاں نہیں جاتیں
  
مُراد دل کی بھی کوئی، کہاں سے بھرآئے
جب اِس حیات سے ناکامیاں نہیں جاتیں

اک آرزو تھی جو حسرت میں ڈھل چکی کب کی  
مگرخیال سے شہنائیاں نہیں جاتیں

ہزارمحفلِ خُوباں میں جا کے دیکھ لیا
مِلی جو تُجھ سے ہیں تنہائیاں نہیں جاتیں

زمانے بھر کی دُکھوں کا ہُوا ہے دل مَسْکن
غموں کی مجھ پہ یہ آسانیاں نہیں جاتیں

حُصول یارکے زُمْرے میں کچھ نُمایاں سے
عمل نہ تھے، کی پشیمانیاں نہیں جاتیں

دیےجو چارہ گروں نے، ہم آزما بھی چکے
  کسی بھی نسخے سے بیتابیاں نہیں جاتیں
  
  خلش،  جو ہوتے مقدّر کا تم سکندر تو
تمہاری زیست سے رعنائیاں نہیں جاتیں

شفیق خلش

****************

.................................................................

********************************

غزلِ

سید محمد حنیف اخگر

دُشواریوں نے راہ کو آساں‌ بنا دیا
ہر مرحَلے کو منزلِ جاناں بنا دیا

کتنی تھی تابِ حُسْن کہ، اُس کی نگاہ نے
ہر آرزو کو شعلہ بداماں بنا دیا

چارہ گروں کی شعبدہ بازی پہ دل نِثار
درماں کو درد، درد کو درماں بنا دیا

محدودِ آرزوئے مُسرّت تھا دل مِرا
وُسعَت نے غم کی، اِس کو بیاباں بنا دیا

اک ذرۂ حقِیر کی قُوَّت تو دیکھئے
تسخِیر کائِنات کو آساں بنا دیا

رُخ پر تِرے ٹھہر کے مِری چشمِ شوق نے
آرائشِ جمال کو آساں بنا دیا

اک جُنْبِشِ نِگاہ بڑا کام کر گئی
تارِ نظر کو جُزوِ رگِ جاں بنا دیا

آیا ہے وہ بھی وقت، کہ اکثر بہار نے
ہرچاکِ گُل کو میرا گریباں بنا دیا

اخگر نِقاب اُلٹ کے، کِسی خوش جمال نے
کارِ دِل و نِگاہ کو آساں بنا دیا

حنیف اخگر

****************

.................................................................

********************************

غزل

خماربارہ بنکوی

وہ کون ہیں جو غم کا مزہ جانتے نہیں
بس دُوسروں کے درد کو پہچانتے نہیں

اِس جبرِ مصلحت سے تو رُسوائیاں بھلی
جیسے کہ ہم اُنھیں وہ ہمیں جانتے نہیں

کمبخت آنکھ اُٹھی نہ کبھی اُن کے رُوبرُو
ہم اُن کو جانتے تو ہیں، پہچانتے نہیں

واعظ خُلوص ہے تِرے اندازِ فکر میں
ہم تیری گفتگو کا بُرا مانتے نہیں

حد سے بڑھے توعلم بھی ہے جہل دوستو
سب کچھ جو جانتے ہیں، وہ کچھ جانتے نہیں

رہتے ہیں عافیّت سے وہی لوگ اے خمار
جو زندگی میں دل کا کہا مانتے نہیں

خماربارہ بنکوی

****************
.................................................................
********************************

غزلِ

سُرُور بارہ بنکوی

زندگی میں لگ چکا تھا غم کا سرمایہ بہت
اس لئے شاید گنوایا ہم نے کم، پایا بہت

راندہِ ہر فصلِ گُل ہم کب نہ تھے، جو اب ہوئے
سُنتے ہیں یاروں کو یہ موسم بھی راس آیا بہت

وہ قریب آنا بھی چاہے اور گُریزاں بھی رہے
اُسکا یہ پِندارِ محبُوبی مُجھے بھایا بہت

کِتنی یادیں، کِتنے منظر آبدِیدہ ہوگئے
جب بھی تنہا آئینہ دیکھا، وہ یاد آیا بہت

سُرُوربارہ بنکوی

 
****************
.................................................................
********************************

غزلِ

احمد فراز

 تڑپ اٹھوں بھی تو ظالم تری دہائی نہ دوں
میں زخم زخم ہوں پھر بھی تجھے دکھائی نہ دوں

ترے بدن میں دھڑکنے لگا ہوں دل کی طرح
یہ اور بات کہ اب بھی تجھے سنائی نہ دوں

خود اپنے آپ کو پرکھا تو یہ ندامت ہے
کہ اب کبھی اسے الزامِ نارسائی نہ دوں

مری بقا ہی مری خواہشِ گناہ میں ہے
میں زندگی کو کبھی زہرِ پارسائی نہ دوں

جو ٹھن گئی ہے تو یاری پہ حرف کیوں آئے
حریفِ جاں کو کبھی طعنِ آشنائی نہ دوں

مجھے بھی ڈھونڈ کبھی محوِ آئینہ داری
میں تیرا عکس ہوں لیکن تجھے دکھائی نہ دوں

یہ حوصلہ بھی بڑی بات ہے شکست کے بعد
کہ دوسروں کو تو الزامِ نارسائی نہ دوں

فراز دولتِ دل ہے متاعِ محرومی
میں جامِ جم کے عوض کاسۂ گدائی نہ دوں

 احمد فراز
****************

.................................................................
********************************
غزلِ

شفیق خلش

دوڑے آتے تھے مرے پاس صدا سے پہلے
اب وہ شاید ہی، کبھی آئیں قضا سے پہلے

عادتیں ساری عنایت کی بدل دیں اُس نے
اب تسلّی نہیں دیتے وہ سزا سے پہلے

روزوشب وہ بھی اذیت میں ہوئے ہیں شامل
یادِ جاناں میں جو رہتے تھے جُدا سے پہلے

خواہشیں ساری جو پنہاں ہیں مرے سینے میں
پوری ہونے کی نہیں تیری وفا سے پہلے

نازوانداز ہے کیا، حُسْن کے نخْرے کیا ہیں
کچھ بھی معلوم نہ تھا، اُن کی ادا سے پہلے

کھُل گئی وصْل کی شب اُن کی حقیقت ہم پر
کتنے معصوم سے لگتے تھے حیا سے پہلے

چا ہے جانے پہ ہی وہ ہوگئے بدنام خلش
کیا سزا پائی ہے نسبت کی خطا سے پہلے

شفیق خلش

****************

.................................................................

********************************

غزلِ

سیماب اکبر آبادی

 

چمک جگنو کی برقِ بے اماں معلوم ہوتی ہے
قفس میں رہ کے قدرِ آشیاں معلوم ہوتی ہے

کہانی میری رودادِ جہاں معلوم ہوتی ہے
جو سنتا ہے اسی کی داستاں معلوم ہوتی ہے

ہوائے شوق کی قوت وہاں لے آئی ہے مجھ کو
جہاں منزل بھی گردِ کارواں معلوم ہوتی ہے

قفس کی پتلیوں میں جانے کیا ترکیب رکھی ہے
کہ ہر بجلی قریبِ آشیاں معلوم ہوتی ہے

ترقی پر ہے روز افزوں خلش دردِ محبت کی
جہاں محسوس ہوتی تھی، وہاں معلوم ہوتی ہے

نہ کیوں سیماب مجھ کو قدر ہو ویرانیئ دل کی
یہ بنیادِ نشاطِ دو جہاں معلوم ہوتی ہے

سیماب اکبر آبادی

****************

.................................................................

********************************

(1)

غزلِ

بیکل اُتساہی

حُسن جلوَہ نہیں عشق کا حاصل تنہا

کتنے جلوؤں کو سمیٹے ہے مِرا دل تنہا

کارواں چھُوٹ گیا رات کے سنّاٹے میں

رہ گئی ساتھ مِرے حسرتِ منزل تنہا

عزْم مُحکم ہو تو ہوتی ہیں بَلائیں پسپا

کتنے طُوفاں کو پلٹ دیتا ہے ساحل تنہا

حُسن ہنگامۂ بازار میں مصروف رہا

عشق تو چُپ ہے سجائے ہُوئے محفل تنہا

سب کے ہونٹوں پہ تبسّم تھا مِرے قتل کے بعد

جانے کیا سوچ کے روتا رہا قاتل تنہا

  لوگ تو ہوگئے بیکل غمِ  دَوراں کا شکار

رہ گیا میں ہی زمانے کے مقابل تنہا

بیکل اتساہی

****************

.................................................................

********************************  

غزلِ
بیکل اتساہی

لئے کائنات کی وسعتیں ہے دیار دل میں بسی ہوئی
ہےعجیب رنگ کی یہ غزل، نہ لکھی ہوئی نہ پڑھی ہوئی

نہیں تم تو کوئی غزل ہوکیا، کوئی رنگ و بو کا بدل ہو کیا
یہ حیات کیا ہو، اجل ہو کیا،  نہ کھلی ہوئی نہ چھپی ہوئی

ہے یہ سچ کہ منظرِخواب ہے میرے سامنے جو کتاب ہے
وہ جبیں کہ جس پہ گلاب کی کوئی پنکھڑی ہے پڑی ہوئی

 وہی ربطِ عکسِ جمال بھی، وہی خبطِ حُسنِ جمال بھی
وہی ضبطِ حُزن وملال بھی شبِ ہجررسمِ خوشی ہوئی

وہ محل کی چھت پہ جو چاند ہے، خدا جانے کاہے کو ماند ہے
یہ طِلِسْم  ہے کسی حُسن کا، یا مری نظر ہے تھکی ہوئی

 بیکل اتساہی   

 

****************

.................................................................

********************************

غزلِ

شادؔ عظیم آبادی

اسیرِ جسم ہوں، معیادِ قید لا معلوم
یہ کس گناہ کی پاداش ہے خدا معلوم

تری گلی بھی مجھے یوں تو کھینچتی ہے بہت
دراصل ہے مری مٹی کہاں کی کیا معلوم

تعلقات کا الجھاؤ ہر طرح ظاہر
گرہ کشائیِ تقدیرِ نارسا معلوم

سفر ضرور ہے اور عذر کی مجال نہیں
مزا تو یہ ہے نہ منزل، نہ راستا معلوم

دعا کروں نہ کروں سوچ ہے یہی کہ تجھے
دعا کے قبل مرے دل کا مُدّعا معلوم

سنی حکایتِ ہستی تو درمیاں سے سنی
نہ ابتدا کی خبر ہے، نہ انتہا معلوم

کچھ اپنے پاؤں کی ہمت بھی چاہیے اے پیر
یہی نہیں تو مددگاریِ عصا معلوم

طلب کریں بھی تو کیا شے طلب کریں اے شادؔ
ہمیں کو آپ نہیں اپنا مُدّعا معلوم

 شادؔ عظیم آبادی

****************

.................................................................

فیض احمد فیض

تم آئے ہو، نہ شبِ انتظار گزری ہے
تلاش میں ہے سحر، بار بار گزری ہے

جنوں میں جتنی بھی گزری، بکار گزری ہے
اگرچہ دل پہ خرابی ہزار گزری ہے

ہوئی ہے حضرتِ ناصح سے گفتگو جس شب
وہ شب ضرور سرِ کوئے یار گزری ہے

وہ بات سارے فسانے میں جس کا ذکر نہ تھا
وہ بات اُن کو بہت ناگوار گزری ہے

نہ گل کھلے ہیں، نہ اُن سے ملے، نہ مے پی ہے
عجیب رنگ میں اب کے بہار گزری ہے

چمن میں غارتِ گلچیں سے جانے کیا گزری
قفس سے آج صبا بے قرار گزری ہے

********************************

 غزلِ

 


ابن انشاء

اس شام وہ رخصت کا سماں یاد رہے گا
وہ شہر، وہ کوچہ، وہ مکاں یاد رہے گا

وہ ٹیس کہ ابھری تھی ادھر یاد رہے گی
وہ درد کہ اٹھا تھا یہاں یاد رہے گا

ہم شوق کے شعلے کی لپک بھول بھی جائیں
وہ شمع فسردہ کا دھواں یاد رہے گا

ہاں بزمِ شبانہ میں ہمیں شوق جو اس دن
ہم تو تری جانب نگراں یاد رہے گا

کچھ میر کے ابیات تھے، کچھ فیض کے مصرعے
اک درد کا تھا، جن میں بیاں یاد رہے گا

آنکھوں میں سلگتی ہوئی وحشت کے جلو میں
وہ حیرت و حسرت کا جہاں یاد رہے گا

جاں بخشی سی اس برگ گل تر کی تراوت
وہ لمس عزیز دو جہاں یاد رہے گا

ہم بھول سکے ہیں نہ تجھے بھول سکیں گے
تو یاد رہے گا، ہمیں ہاں یاد رہے گا


ابن انشاء
شیرمحمد خان

****************

.................................................................

********************************

غزلِ 

بیخود دہلوی

یہ دل کبھی نہ محبت میں کامیاب ہُوا

مجھے خراب کِیا آپ بھی خراب ہُوا

اَجل میں،زِیست میں، تربت میں، حشْرمیں ظالم

تِرے سِتم کے لِئے میں ہی اِنتخاب ہُوا

نگاہِ مست کو ساقی کی کون دے الزام

مِرا نصیب، کہ رُسوا مِرا شباب ہُوا

ہمارے عشق کی دس بیس نے بھی داد نہ دی

کِسی کا حُسن، زمانے میں اِنتخاب ہُوا

فنا کا دعویٰ ہزاروں کو تھا، زمانے میں

حباب نے مجھے دیکھا، تو آب آب ہُوا

بیخود دہلوی

****************
.................................................................
********************************

غزلِ

شہزاد احمد
ممکن ہو آپ سے تو بھلا دیجئے مجھے
پتھر پہ ہوں لکیر مٹا دیجئے مجھے

ہر روز مجھ سے تازہ شکایت ہے آپ کو
میں کیا ہوں، ایک بار بتا دیجئے مجھے

میرے سوا بھی ہے کوئی موضوعِ گفتگو
اپنا بھی کوئی رنگ دکھا دیجئے مجھے

میں کیا ہوں کس جگہ ہوں مجھے کچھ خبر نہیں
ہیں آپ کتنی دور صدا دیجئے مجھے

کی میں نے اپنے زخم کی تشہیر جا بجا
میں مانتا ہوں جرم سزا دیجئے مجھے

قائم تو ہو سکے کوئی رشتہ گہر کے ساتھ
گہرے سمندروں میں بہا دیجئے مجھے

شب بھر کرن کرن کو ترسنے سے فائدہ
ہے تیرگی تو آگ لگا دیجئے مجھے

جلتے دنوں میں خود پسِ دیوار بیٹھ کر
سائے کی جستجو میں لگا دیجئے مجھے

شہزادؔ یوں تو شعلۂ جاں سرد ہو چکا
لیکن سُلگ اٹھیں تو ہوا دیجئے مجھے

شہزاد احمد

****************

.................................................................

********************************

 

  غزلِ

بسمل عظیم آبادی

تنگ آگئے ہیں کیا کریں اِس زندگی سے ہم

گھبرا کے پُوچھتے ہیں اکیلے میں جی سے ہم

مجبُوریوں کو اپنی، کہیں کیا کسی سے ہم

لائے گئے ہیں ، آئے نہیں ہیں خوشی سے ہم

کمبخت دل کی مان گئے ، بیٹھنا پڑا

یوں تو ہزار بار اُٹھے اُس گلی سے ہم

یارب! بُرا بھی ہو دلِ خانہ خراب کا

شرما رہے ہیں اِس کی بدولت کسی سے ہم

دن ہی پہاڑ ہے! شَبِ غم کیا ہو، کیا نہ ہو

گھبرا رہے ہیں آج سرِ شام ہی سے ہم

دیکھا نہ تم نے آنکھ اُٹھا کربھی ایک بار

گُزرے ہزار بار تمہاری گلی سے ہم

مطلب یہی نہیں؟  دلِ خانہ خراب کا

کہنے میں اِس کے آئیں، گُزرجائیں جی سے ہم

چھیڑا عدُو نے، رُوٹھ گئے ساری بزْم سے

بولے، کہ اب نہ بات کریں گے کسی سے ہم

تم سُن کے کیا کرو گے کہانی غریب کی

جوسب کی سُن رہا ہے، کہیں گے اُسی سے ہم

محفل میں اُس نے غیر کو، پہلو میں دی جگہ

گُزری جو دل پہ کیا کہیں بسمل کسی سے ہم

بسمل عظیم آبادی

 (سیّد شاہ محمد حسن عرف چھبو)

 1978 - 1900

****************

.................................................................

********************************

غزلِ

بیخود دہلوی

شمْعِ مزار تھی، نہ کوئی سوگوار تھا
تم جس پہ رو رہے تھے، وہ کِس کا مزارتھا

تڑپُوں گا عمْر بھر دِلِ مرحُوم کے لئے
کمبَخت، نامُراد، لڑکپن کا یار تھا

سودائے عِشق اور ہے، وحشت کچھ اورشے
مجنُوں کا کوئی دوست فسانہ نِگار تھا

جادُو ہے یا طِلسْم تمھاری زبان میں
تم جُھوٹ کہہ رہے تھے، مجھے اعتبارتھا

کیا کیا ہمارے سجدوں کی رُسوائیاں ہوئیں
نقشِ قدم کسی کا سرِ رہگزار تھا

اِس وقت تک تو، وضْع میں آیا نہیں ہے فرق
تیرا کرَم شریک جو پروردگار تھا

بیخود دہلوی

****************
.................................................................
********************************

غزلِ

سیّدعابدعلی عابد

برمصرعِ حافظ شیرازی

دن ڈھلا،  شام ہُوئی،  پُھول کہِیں لہرائے
سانپ یادوں کے مہکتے ہوئے ڈسنے آئے

وہ کڑی دُھوپ کے دن، وہ تپشِ راہِ وفا
وہ سوادِ شبِ گیسُو کے گھنیرے سائے

دولتِ طبعِ سُخن گو، ہے امانت اُس کی
جب تری چشمِ سُخن ساز طلب فرمائے

جُسْتجُوئےغمِ دَوراں کو خِرد نکلی تھی
کہ جُنوں نےغمِ جاناں کے خزینے پائے

سب مجھے مشورۂِ ترکِ وفا دیتے ہیں
اُن کا ایما بھی ہو شامل تو مزہ آجائے

کیا کہوں دل نے کہاں سینت کے رکھا ہے اُسے
نہ کبھی بُھولنے پاؤں،  نہ مجھے یاد آئے

میں نے حافِظ کی طرح، طے یہ کِیا ہےعابد
٠بعد ازِیں مے نہ خورم بے کفِ بزم آرائے٠

   سیّدعابدعلی عابد

****************
.................................................................
********************************
غزلِ

احمد فراز

گزرا ہوں جس طرف سے بھی پتھر لگے مجھے

ایسے بھی کیا تھے لعل و جواہر لگے مجھے

لو ہو چکی شفا کہ مداوائے دردِ دل

اب تیری دسترس سے بھی باہر لگے مجھے

ترسا دیا ہے ابرِ گریزاں نے اس قدر

برسے جو بوند بھی تو سمندر لگے مجھے

تھامے رہو گے جسم کی دیوار تابکے

یہ زلزلہ تو روح کے اندر لگے مجھے

گر روشنی یہی ہے تو اے بدنصیب شہر

اب تیرگی ہی تیرا مقدر لگے مجھے

منزل کہاں کی زادِ سفر کو بچائیو!

اب رہزنوں کی نیّتِ رہبر لگے مجھے

وہ مطمئن کہ سب کی زباں کاٹ دی گئی

ایسی خموشیوں سے مگر ڈر لگے مجھے

وہ قحطِ حرفِ حق ہے کہ اس عہد میں فراز

خود سا گنہگار پیمبر لگے مجھے

 احمد فراز

****************
.................................................................
********************************

غزل

سراج اورنگ آبادی

گلشنِ عالم میں آسائش نہیں
یہاں گلِ عشرت کی پیدائش نہیں

صاف دل کوں ہے نمد پوشی سیں کام
آرسی کوں ذوقِ آرائش نہیں

کیوں نہ تجھ قد کوں کہوں سرو سہی
راست ہے کچھ اس میں بالائش نہیں

رحم کر تقصیر میری کر معاف
کیا گنہہ گاروں کو بخشایش نہیں

دل میں رہتا ہے خیال اُس یار کا
غیر کوں اِس گھر میں گنجائش نہیں

کون سا دم ہے کہ جاناں بن سراج
شوق کے شعلوں کوں افزائش نہیں

****************
.................................................................
********************************

غزلِ

آغا شورش کاشمیری

فضا میں رنگ، ستاروں میں روشنی نہ رہے
 ہمارے بعد یہ،  ممکن ہے زندگی نہ رہے

خیالِ خاطرِ احباب واہمہ ٹھہرے
اِس انجمن میں کہیں رسمِ دوستی نہ رہے

فقیہہ شہر کلامِ خُدا کا تاجر ہو
خطیبِ شہر کو قرآں سے آگہی نہ رہے

قبائے صُوفی و مُلّا کا نرْخ سستا ہو
بِلال چُپ ہو، اذانوں میں دلکشی نہ رہے

نوادراتِ قلم پر ہو مُحْتسب کی نظر
مُحیط ہو شبِ تاریک، روشنی نہ رہے

اِس انجمن میں عزیزو! یہ عین ممکن ہے
ہمارے بعد چراغوں میں روشنی نہ رہے

آغا شورش کاشمیری

****************
.................................................................
********************************

غزلِ

شیفتہ

اثرِ آہِ  دلِ  زار کی افوائیں ہیں
یعنی مُجھ پر کرمِ یار کی افوائیں ہیں

شرْم، اے نالۂ دِل!  خانۂ اغیار میں بھی
جوشِ افغانِ عزابار کی افوائیں ہیں

کب کیا دل پہ مرے، پندونصیحت نے اثر؟
ناصحِ بیہودہ گفتار کی افوائیں ہیں

جنسِ دل کے وہ خریدار ہوئے تھے کس دن؟
یہ یونہی کوچہ وبازار کی افوائیں ہیں

قیس وفرہاد کا منہ؟  مجھ سے مقابل ہونگے؟
مَردُمِ وادی وکُہسار کی افوائیں ہیں

یہ بھی کچھ بات ہے،  میں اور کروں غیر سے بات؟
تم نہ مانو، کہ یہ اغیار کی افوائیں ہیں

کس توقع پہ جئیں شیفتہ،  مایوسِ کرم؟
غیر پر بھی ستمِ یار کی افوائیں ہیں

نواب محمد مصطفیٰ خان شیفتہ

****************
.................................................................
********************************

غزلِ

انور جاوید ہاشمی

غروروتمکنت وشوق میں، جو تن کے گئے
دریدہ رُوح ہوئی، اور لباس تن کے گئے

عجیب  طور سے ہم مبتلائے عشق ہوئے
گلی میں یار کی، ا کثر فقیر بن کے گئے

نہ مانی دل نےکوئی بات، لاکھ سمجھایا
کہ وہ زمانے میاں قیس وکوہکن کے گئے

رہے کہاں،  وہ پرانے عزیز دوست سبھی
جو ہمکلام ہمارے تھے انجمن کے، گئے

بجزمذاق،  کوئی ماحصل نہ دیکھو گے
قرینے  ہاتھ سے گر، ہاشمی سخن کے گئے

انور جاوید ہاشمی

****************
.................................................................
********************************

غزلِ

 اکبرالٰہ آبادی

 
 

 اے بُتو بہرِخُدا درپئے آزار نہ ہو
خیرراحت نہ سہی، زیست تو دشوار نہ ہو

یا رب ایسا کوئی بت خانہ عطا کر جس میں
ایسی گزرے کہ تصوّر بھی گنہگار نہ ہو

مُعترِض ہو نہ مِری عُزلت و خاموشی پر
کیا کروں جبکہ کوئی محرمِ اسرار نہ ہو

کیا وہ مستی، کہ دَمِ چند میں تکلیف شُمار
مست وہ ہے کہ قیامت میں بھی ہشیار نہ ہو

جان فرقت میں نہ نکلے تومجھے کیوں ہوعزیز
دوست وہ کیا جو مُصیبت میں مددگار نہ ہو

ناز کہتا ہے کہ زیور سے ہو تزئینِ جمال
نازکی کہتی ہے سُرمہ بھی کہیں بار نہ ہو

دل وہ ہے جس کو ہو سودائے جمالِ معنی
آنکھ وہ ہے کہ جو صُورت کی خریدار نہ ہو

دلِ پُر داغ کو ارماں، کہ گلے اُن کے لگے
اُن کو یہ ڈر، کہ گلے کا یہ کہِیں ہار نہ ہو

عاشقِ چشم سیہ مست تو زنہار نہ ہو
دیکھ اُس جان کی گاہک کا خریدار نہ ہو

ہرغُبارِ رہِ اُلفت ہے مِرا سُرمۂ چشم
دل یہ کہتا ہے کہ یہ خاکِ درِ یار نہ ہو

لن ترانی کی خبر عشق نے سُن رکھّی ہے
پھربھی مشکل ہے کہ وہ طالبِ دیدار نہ ہو

تم کوسودائے ستم کیوں ہے جو ہے شوقِ فُروغ
کیا تلَطُّف سببِ گرمئیِ بازار نہ ہو

قیمتِ دل تو گھٹانے کا نہیں میں اکبر
بے بصیرت نہیں ہوتا جوخریدار نہ ہو

 
اکبرالٰہ آبادی

 
****************
.................................................................
********************************

غزل

اکبرالٰہ آبادی

میری تقدیر موافق نہ تھی تدبیر کے ساتھ

کُھل گئی آنکھ نگہباں کی بھی، زنجیر کے ساتھ

کُھل گیا مصحفِ رخسارِ بُتانِ مغرب

ہو گئے شیخ بھی حاضر نئی تفسیر کے ساتھ

ناتوانی مِری دیکھی، تو مصوّر نے کہا

ڈر ہے، تم بھی کہیں کِھنچ آؤ نہ تصویر کے ساتھ

بعد سیّد کے، میں کالج کا کروں کیا درشن

اب محبت نہ رہی اُس بُتِ بے پِیر کے ساتھ

میں ہوں کیا چیز، جو اُس طرز پہ جاؤں اکبر

ناسخ و ذوق بھی، جب چل نہ سکے میر کے ساتھ

اکبرالٰہ آبادی

Ghazal

Akbar Allahabadi

Meri taqdeer mouafiq na thi tadbeer ke saath

Khul gaii aankh nighbaaN ki bhi, zanjeer ke saatha

Khul gaya mas’haf-e-rukhsaar-e-butaane maghrib

Ho ga’aiy sheikh bhi haazir naii tafseer ke saath

Naa’tawaani miri daikhi to mussuwar ne kahaa

Der hai tum bhi kahieN khich aao na tasveer ke saath

Baad syed ke, meN college ka karooN kiya dershan

Ab muhabbat nah rahi us but-e-be peer ke saath

meN hoon kiya cheez jo us tarz peh jaaooN Akbar

Naasikh-o-Zauq bhi, jab chal na sake Meer ke saath

****************
.................................................................
********************************

غزلِ

 اکبرالٰہ آبادی

بُہت رہا ہے کبھی لطف یار ہم پر بھی
گزرچُکی ہے یہ فصلِ بہار ہم پر بھی

عروس دہر کو آیا تھا پیار ہم پر بھی
یہ بیسوا تھی کسی شب نِثار ہم پر بھی

بِٹھا چکا ہے زمانہ ہمیں بھی مسند پر
ہُوا کئے ہیں جواہر نِثار ہم پر بھی

عدو کوبھی جو بنایا ہے تم نےمحرمِ راز
تو فخْر کیا، جو ہُوا اعتبار ہم پر بھی

خطا کسی کی ہو لیکن کُھلی جو اُنکی زباں
تو ہو ہی جاتے ہیں دو ایک وار ہم پر بھی

ہم ایسے رند، مگر یہ زمانہ ہے وہ غضب
کہ ڈال ہی دِیا دُنیا کا بار ہم پر بھی

ہمیں بھی آتشِ اُلفت جَلا چُکی اکبر
حرام ہوگئی دوزخ کی نار ہم پر بھی

اکبرالٰہ آبادی

****************
.................................................................
********************************
غزلِ

احمد فراز  

آنکھوں میں ستارے تو کئی شام سے اترے
پر دل کی اداسی نہ در و بام سے اترے

کچھ رنگ تو ابھرے تری گل پیرہنی کا
کچھ زنگ تو آئینہء ایام سے اترے

ہوتے رہے دل لمحہ بہ لمحہ تہہ و بالا
وہ زینہ بہ زینہ بڑے آرام سے اترے

جب تک ترے قدموں میں فروکش ہیں سبو کش
ساقی خطِ بادہ نہ لبِ جام سے اترے

بے طمع نوازش بھی نہیں سنگ دلوں کی
شائد وہ مرے گھر بھی کسی کام سے اترے

اوروں کے قصیدے فقط آورد تھے جاناں
جو تجھ پہ کہے شعر وہ الہام سے اترے

اے جانِ فراز اے مرے ہر دکھ کے مسیحا
ہر زہر زمانے کا تیرے نام سے اترے

 احمد فراز
********************

غزل

اسرارالحق مجاز

جنونِ شوق اب بھی کم نہیں ہے

مگر یہ آج بھی برہم نہیں ہے

بہت مُشکل ہے دُنیا کا سنْوَرنا

تِری زُلفوں کا پیچ وخم نہیں ہے

بہت کچھ اوربھی، ہے اِس جہاں میں

یہ دُنیا محْض غم ہی غم نہیں ہے

تقاضہ کیوں کروں پیہم نہ ساقی 

کِسے یاں فکرِ بیش وکم نہیں ہے

اُدھر مشکوک ہے میری صداقت

اِدھر بھی بدگمانی کم نہیں ہے

مِری بربادیوں کا ہم نشینوں

تمہیں کیا خود مجھے بھی غم نہیں ہے

ابھی بزمِ طرب سے کیوں اُٹھوں میں

ابھی توآنکھ بھی پُرنم نہیں ہے

مجاز اِک بادہ کش تو ہے یقیناََ

جو ہم سُنتے تھے، وہ عالم نہیں ہے

اسرارالحق مجاز
 *****
 --------------------

غزلِ

 حسین باندی شباب بنارسی

مے کشی کا لطف تنہائی میں کیا، کچھ بھی نہیں
یار پہلو میں نہ ہو جب تک، مزا کچھ بھی نہیں

تم رہو پہلو میں میرے، میں تمہیں دیکھا کروں
حسرتِ دل اے صنم، اِس کے سوا کچھ بھی نہیں

حضرتِ دل کی بدولت میری رسوائی ہوئی
اس کا شکوہ آپ سے اے دلربا کچھ بھی نہیں

قسمتِ بد دیکھئے، پُوچھا جو اُس نے حالِ دل
باندھ کے ہاتھوں کومیں نے کہہ دیا، کچھ بھی نہیں

آپ ہی تو چھیڑ کرپُوچھا ہمارا حالِ دل
بولے پھرمنھ پھیرکے، ہم نے سُنا کچھ بھی نہیں

کوچہؑ الفت میں انساں دیکھ کے رکھے قدم
ابتدا اچھی ہے اِس کی، انتہا کچھ بھی نہیں

حسین باندی شباب بنارسی

 *****
 --------------------

غزل

رسا چغتائی

کیسے کیسے خواب دیکھے، دربدر کیسے ہُوئے

کیا بتائیں روز و شب اپنے بَسر کیسے ہُوئے

نینْد کب آنکھوں میں آئی، کب ہَوا ایسی چلی

سائباں کیسے اُڑے، ویراں نگر کیسے ہُوئے

کیا کہیں وہ زُلفِ سرکش کِس طرح ہم پر کھُلی

ہم طرف دارِ ہوائے رہگُزر کیسے ہُوئے

حادثے ہوتے ہی رہتے ہیں مگر یہ حادثے

اک ذرا سی زندگی میں، اِس قدر کیسے ہوئے

ایک تھی منزل ہماری، ایک تھی راہِ سفر

چلتے چلتے تم اُدھر، اور ہم اِدھر کیسے ہُوئے

رسا چغتائی

 *************************

غزلِ

پیر نصیرالدین شاہ نصیر

کبھی اُن کا نام لینا کبھی اُن کی بات کرنا
مِرا ذوق اُن کی چاہت مِرا شوق اُن پہ مرنا

وہ کسی کی جھیل آنکھیں وہ مِری جُنوں مِزاجی
کبھی ڈُوبنا اُبھر کر کبھی ڈُوب کر اُبھرنا

تِرے منچلوں کا جگ میں یہ عجب چلن رہا ہے
نہ کِسی کی بات سُننا نہ کِسی سے بات کرنا

شبِ غم نہ پُوچھ کیسے تِرے مُبتلا پہ گُزری
کبھی آہ بھر کے گِرنا کبھی گِر کے آہ بھرنا

وہ تِری گلی کے تیور، وہ نظر نظر پہ پہرے
وہ مِرا کِسی بہانے تُجھے دیکھتے گُزرنا

کہاں میرے دِل کی حسرت، کہاں میری نارسائی
کہاں تیرے گیسوؤں کا تِرے دوش پر بِکھرنا

چلے لاکھ چال دُنیا ہو زمانہ لاکھ دُشمن
جو تِری پناہ میں ہو اُسے کیا کِسی سے ڈرنا

وہ کریں گے ناخُدائی تو لگے گی پار کشتی
ہے نصیر ورنہ مُشکل تِرا پار یوں اُترنا

مزید غزلوں کے لئے یہاں کلک کریں

Ghazals in RomanUrdu